Howo yakoze impanuka igwa muri Nyabarongo

Ubuyobozi bw’Umurenge wa Nyarusange bwatangaje ko imodoka yari atwawe n’umushoferi witwa Mugwaneza Idrissa yaguye mu mugezi wa Nyabarongo.

Iyi mpanuka yabereye mu Mudugudu wa Murambi, Akagari ka Musongati, Umurenge wa Nyarusange, mu Karere ka Muhanga.

Umunyamabanga Nshingwabikorwa w’Umurenge wa Nyarusange, Byicaza Jean Claude, yemeje ko uyu mushoferi yakoreraga ikompanyi y’Abashinwa ikora umuhanda Muhanga-Karongi.

Avuga ko iyi modoka yabuze feri, uwari uyitwaye agerageza kuyegeka ku mukingo ariko iramunanira igwa muri Nyabarongo.

Ati: “Feri yabuze; Mugwaneza ageze hafi y’ikiraro, ubu yarengewe, ntabwo Mugwaneza n’imodoka baraboneka.”

Gitifu Byicaza avuga ko iyi mpanuka ikimara kuba, bahise batabaza Polisi Ishami rishinzwe umutekano mu mazi, bakaba bamaze kuhagera.

Ati: “Kugeza ubu, abatanze amakuru baravuga ko Mugwaneza ari we warohamye muri Nyabarongo, gusa bavuga ko bataramenya niba hari undi yari atwaye muri iyo modoka yo mu bwoko bwa HOWO.”