Israel irashaka kwagurira imipaka yabo muri Liban

Minisitiri w’Imari muri Israel, Bezalel Smotrich, yatangaje ko igihugu cyabo gikwiriye gufata ubutaka bwo mu majyepfo ya Liban mu murongo wo guhashya byuzuye umutwe wa Hezbollah uhabarizwa wakomeje kubazengereza.

Ku wa 23 Werurwe 2026, uyu muyobozi yavuze ko umupaka uhuza Israel na Liban ugomba kwimurwa ukagera ku mugezi wa Litani, uherereye mu bilometero 40 uvuye ku mupapa uhuza ibihugu byombi ujya muri Liban.

Mu ntangiriro za Werurwe 2026 ni bwo Israel yatangije ibikorwa byo guhashya mu buryo bwuzuye umutwe wa Hezbollah.

Uyu mutwe wari watangije ibitero kuri Israel uvuga ko ugamije guhorera uwari Umuyobozi w’Ikirenga wa Iran, Ali Khamenei wari wishwe mu ntambara igikomeje hagati ya Israel, Iran na Amerika.

Ni intambara yatangiye ku wa 28 Gashyantare 2026. Umuryango uharanira uburenganzira bwa muntu wo muri Amerika uzwi nka ‘Human Rights Activists News Agency’, ugaragaza ko abamaze kuyigwamo barenga 3200 barimo abasivili 1400.

Israel yasabye abatuye mu majyepfo ya Liban kuba mu gice cy’amajyepfo ya Litani, kubera ko igiye gutangizayo ibitero simusiga byo guhashya Hezbollah.

Ubuyobozi muri Liban, bugaragaza ko ibitero bya Israel bimaze kwicirwamo abaturage 880 mu byumweru bibiri bishize, bikomeretsa 2000 mu gihe abandi bagera muri miliyoni bavuye mu byabo.

Minisitiri w’Imari muri Israel, Bezalel Smotrich, ati “Ndabivuga nemye, mu byavugwaho byose, umupaka wa Israel mushya ugomba kuba Litani. Ibi bikorwa bigomba guhindura ibintu, haba Hezbollah ariko bigomba guhindura n’imipaka ya Israel.”

Mu minsi ishize Minisitiri w’Ingabo wa Israel, Israel Katz, yavuze ko Liban ishobora kubura ubutaka bwayo mu gihe yagenda biguru ntege mu kwambura intwaro Hezbollah.

Ni mu gihe ku wa 22 Werurwe 2026, Ingabo za Israel zatangaje ko zigiye kwagura ibikorwa bya gisirikare muri Liban byaba ibyo ku butaka n’ibyo mu kirere.