Meteo Rwanda yatangaje ko kuva tariki 21-28 Gashyantare hazagwa imvura idasanzwe

Ikigo cy’Igihugu gishinzwe Iteganyagihe, Meteo Rwanda, cyatangaje ko mu gice cya gatatu cya Gashyantare (kuva tariki 21-28 Gashyantare 2026), mu Rwanda hazagwa imvura iri hagati ya milimetero 40 na 150, mu gihe isanzwe igwa itarenga milimetero 80.

Meteo Rwanda yahamije ko impuzandengo y’imvura isanzwe igwa iri hagati ya milimetero 10 na 80.

Biteganyijwe ko iminsi izagwamo imvura izaba iri hagati y’ine n’itandatu bitewe n’imiterere ya buri hantu.

Itangazo riti “Imvura iteganyijwe izaturuka ku isangano ry’imiyaga iva mu gice cy’amajyepfo y’Isi rizamuka rigana mu karere u Rwanda ruherereyemo no ku bwiyongere bw’ubuhehere bw’umwuka buturuka ahanini ku miyaga iva mu burengerazuba bw’Inyanja y’Ubuhinde yerekeza mu Karere u Rwanda ruherereyemo.”

Ubushyuhe bwo hejuru buteganyijwe buri hagati ya dogere Celsius 21 na 30, naho ubushyuhe bwo hasi buteganyijwe buri hagati ya dogere Celsius 9 na 18.

Imvura iri hagati ya milimetero 130 na 150, iteganyijwe mu Turere twa Nyamagabe, Nyaruguru na Rusizi, henshi mu Karere ka Nyamasheke, ibice byo hagati n’amajyepfo y’Uturere twa Gisagara na Huye, amajyepfo y’Akarere ka Karongi n’uburengerazuba bw’Uturere twa Nyanza na Ruhango.

Imvura iri hagati ya milimetero 80 na 110 iteganyijwe mu Mujyi wa Kigali, mu bice bisigaye by’Intara y’Amajyaruguru n’iy’Amajyepfo, Akarere ka Bugesera uretse uburasirazuba bwako, ibice bito by’uburengerazuba bw’Uturere twa Nyagatare, Gatsibo na Rwamagana.

Ahasigaye mu Ntara y’Iburasirazuba hateganyijwe imvura iri hagati ya milimetero 60 na 80 uretse ibice byo hagati n’amajyaruguru by’Uturere twa Nyagatare na Gatsibo hateganyijwe imvura iri hagati ya milimetero 40 na 60.

Imvura yaguye mu gice cya kabiri ni nyinshi ugereranyije n’imyaka yashize

Ubusesenguzi bw’ibipimo bya Meteo Rwanda bwagaragaje ko hafatiwe ku bipimo by’imyaka myinshi ishize (nibura mirongo itatu), mu minsi 10 y’igice cya kabiri cy’ukwezi kwa Gashyantare 2026, kuva tariki ya 11 kugeza tariki ya 20, imvura yiyongereye mu bice byinshi by’Igihugu ugereranyije n’ikigero cy’impuzandengo y’imvura isanzwe igwa muri aya mataliki; uretse mu Turere twa Nyagatare, Rulindo, Nyamasheke, Huye, Gisagara na Nyanza habonetse imvura nke ugereranyije n’impuzandengo y’imvura yahaguye mu myaka myinshi ishize. Imvura ikaba yaraguye hagati y’iminsi itatu n’iminsi icyenda.

Mu minsi 10 y’igice cya kabiri cy’ukwezi kwa Gashyantare 2026, mu Turere twa Nyamasheke, Rusizi, Rutsiro, Burera, Gicumbi, Gakenke, Ngoma, Rwamagana na Gisagara niho haguye imvura nyinshi ugereranyije n’ahandi mu Gihugu.

Imvura ingana na milimetero (mm) 130,6 ni yo nyinshi yaguye muri iki gice, ipimirwa ku bupimiro bwa Ntendezi buherereye mu Karere ka Nyamasheke, igwa mu minsi icyenda, ikurikirwa n’ubupimiro bwa Butaro bwo mu Karere ka Burera, hapimwe (mm) 119,4 mu minsi irindwi, n’ubwa Zaza bwo mu Karere ka Ngoma hapimiwe (mm) 108,6 mu minsi itandatu.

Isesengura ryakozwe ku gipimo cy’imyaka myinshi ishize ryagaragaje ko imvura yiyongereye mu turere twinshi tw’igihugu uretse mu Turere twa Nyagatare, Rulindo, Nyamasheke, Huye, Gisagara na Nyanza aho imvura yagabanyutse.