Ubwonko bw’umuntu ni rumwe mu ngingo z’umubiri zikomeye kandi zitangaje kurusha izindi. Nubwo busa n’aho ari buto ugereranyije n’ibindi bice by’umubiri, bufite ubushobozi budasanzwe bwo kubika amakuru menshi cyane.
Abahanga mu by’imitekerereze y’ubwonko bagaragaza ko ubwonko bushobora kubika amakuru angana na terabytes zirenga 2.5, bingana n’ubushobozi bwa mudasobwa zigezweho zibika amashusho, amajwi n’inyandiko mu bwinshi butangaje.
Ibi bituma ubwonko bw’umuntu burusha kure mudasobwa zisanzwe mu kubika no gutunganya amakuru. Mu gihe mudasobwa ikenera disiki (Disc) nini cyangwa “memory” kugira ngo ibike amakuru menshi, ubwonko bwo bukoresha uturemangingo twihariye twitwa neurons dukorana mu buryo bw’imiyoboro (network) igoye cyane.
Iyi miyoboro ni yo ituma umuntu yiga, yibuka ndetse agafata ibyemezo hashingiwe ku byo yabonye cyangwa yize mbere.
Ikindi gitangaje ni uko ubwonko butabika amakuru gusa, ahubwo bunayatunganya mu buryo bwihuse cyane. Urugero ni uko umuntu ashobora kubona isura akayimenya mu kanya gato cyane, cyangwa akumva ijwi akamenya uwo ari we atarinze kubanza gutekereza cyane. Ibi byose bikorwa n’ubwonko mu gihe gito cyane ugereranyije n’uko mudasobwa zisanzwe zibikora.
Nubwo mudasobwa zifite ubushobozi bwo gukora imibare myinshi vuba cyane, ubwonko bwo bufite akarusho mu bijyanye no kwiga, guhanga udushya no guhuza amakuru atandukanye mu buryo bwumvikana. Ni yo mpamvu abantu bashobora kwiga indimi nshya, kwibuka ibyabaye kera ndetse bagakoresha ayo makuru mu gukemura ibibazo by’ubu buzima.
Nubwo ikoranabuhanga rikomeje gutera imbere ku muvuduko mwinshi, ubushobozi bw’ubwonko bw’umuntu buracyari ku rwego rwo hejuru cyane ku buryo budashobora kugereranywa byoroshye na mudasobwa zisanzwe. Ibi bigaragaza ko ubwonko ari igikoresho cy’agaciro gakomeye umuntu yahawe, kandi gikeneye gukoreshwa neza mu kwiga no guteza imbere imibereho ye ya buri munsi.
