Hamenyekanye icyatumye umusore uherutse kuraswa yica umukunzi we amukase umutwe

Polisi y’u Rwanda yemeje ko yarashe umusore witwa Ruberintwari Nelson w’imyaka 33 wari mu bwihisho nyuma yo gukekwaho ko ari we wishe uwari umukunzi we banakoraga mu kabari kamwe mu murenge wa Masaka.

Inkuru y’urupfu rw’umukobwa witwa Umutoniwase Diane (Mutoni) wishwe n’abantu batahise bamenyekana, bikaba byarabaye mu ijoro rya tariki 20 Ugushyingo, 2025, mu Mudugudu wa Cyugamo, Akagari ka Gako, mu murenge wa Masaka, mu Karere ka Kicukiro.

Amajwi yacicikanye ku mbuga nkoranyambaga, uyu musore witwa Ruberintwari yumvikana avugana n’umusore n’umukobwa b’inshuti ze, bamubaza icyamuteye kwica uriya mukobwa bari inshuti.

Umusore avuga ko yagiye kureba Ruberintwari nyuma yo kumva amakuru y’uko ari we wishe “Umutoniwase”.

Ruberintwari muri icyo kiganiro avuga ko “yakundaga Umutoniwase, …avuga ko yagiranye ikibazo na we kuko yamwimye amafaranga…”

Mu kiganiro yagiranye n’abo bantu b’inshuti ze kuri telefoni, yavuze ko mu mvira yagwaga (ku wa Kane) yavuye mu rugo yambaye botte, yambara ikoti, anywa inzoga ya Gilbis, nyuma ananywa iyitwa Martin, ariko ngo yari afite icyuma mu ikoti ati “mu mutwe wange byari byivanze”.

Yavuze ko ari we wishe Umutoniwase mu buryo bwa kinyamaswa, ko nta wundi wamumufashije.

Abazi Umutoniwase bavuga ko yari umuntu mwiza, utagira uwo abangamira.

Uyu musore Ruberintwari wavuganaga n’inshuti ze kuri telefoni, avuga ko yishe uwari umukunzi we amujijije amafaranga y’u Rwanda ibihumbi 300Frw.

Inshuti ye (yamubwiraga mabanga ye yose), imubwira ko yakosheje kwica umuntu amujijije ayo mafaranga, ndetse amumwibutsa ko hari umugore babyaranye ntibabana kandi ngo ntiyamwishe, none akaba yihekuye yica inshuti ye, asize umwana yabyaye, n’umwana inshuti ye Diane yari afite, bombi abasize ari imfubyi.

Izi nshuti za Ruberintwari zamusabaga kwishyikiriza inzego z’ubutabera, by’umwihariko RIB akajya kwirega, ariko undi yari yihishe, ni na we wabasabye gufata amajwi y’ikiganiro bagiranye.

Uyu musore yabwiye inshuti ze ko “yari amaze igihe yaratekereje gukora biriye” kandi ngo yanasize yanditse urwandiko rw’impamvu yabyo.

Ruberintwari yarashwe….

Umuvugizi wa Polisi y’u Rwanda mu Ntara y’Iburasirazuba, SP Twizeyimana Hamdun, yabwiye IGIHE ko kuri uyu wa Gatandatu, tariki 22 Ugushyingo, 2025 mu gihe cya saa tanu n’igice (11hh30 a.m), mu Murenge wa Fumbwe mu karere ka Rwamagana, ari bwo Polisi yabonye amakuru y’uko hari umusore w’imyaka 33 (Ruberintwari) wari wagize uruhare mu kwica Mutoni Diane uhihishe.

Yagize ati “Polisi yabonye amakuru igera aho bari bayirangiye ko ashobora kuba ari ho ari, bahageze uwo musore yanga gukingura, ….

Nyiri urugo bamusobanurira ko bari gushaka uwo muntu, araza aramukinguza. Umusore afata icyuma atangira gutera abantu ubwoba, ababwira ko umuntu uri bumwegere ari bumwice, mu gihe bakivugana gutyo ahita yitera icyuma arikomeretsa.”

SP Twizeyimana yakomeje abwira IGIHE ko Ruberintwari yashatse gutera icyuma n’Umupolisi ahita amurasa. Yavuze ko uwo musore yahise apfa.