Kenya: Indege Perezida agendamo yakundaga kunengwa n’abaturage ko ishaje igiye gusimbuzwa

Indege itwara Perezida wa Kenya izwi nka ‘Harambee One’ yajyanywe gukanikirwa mu Buholandi. Ni yo nshuro ya nyuma ijyanyweho mbere y’uko isimbuzwa indi nshya izajya itwara umukuru w’igihugu.

Iyi ndege yo mu bwoko bwa Fokker 70 ER Abanya-Kenya bakunze kugaragaza ko ishaje idakwiriye kuba yatwara perezida wabo. Impamvu ni uko imaze imyaka 30. Yatwaye abaperezida bane kuva kuri Daniel arap Moi kugeza kuri William Ruto uyikoresha ubu.

Minisitiri w’Ingabo za Kenya, Soipan Tuya, yemeje ko iyi ndege izamara umwaka iri gukanikirwa mu kigo cyo mu Buholandi kizwi nka Fokker Services Group gikora ibikoresho bisimbura indege zo mu bwoko bwa Fokker.

Minisitiri Tuya yavuze ko ari bwo bwa nyuma igiye gukanikwa mbere y’uko isimbuzwa indi nshya.

Iyi ndege yaguzwe mu 1995 ubwo Daniel arap Moi yari ku butegetsi muri Kenya nyuma y’umwaka ikigo cyo mu Buholandi gihagarika gukora izi ndege.

Kuva ubwo iyo ibyuma by’iyi yo muri Kenya bishaje bisaba ko ibishya bishakishwa mu bindi bigo, hanyuma bigashyirwa Fokker Services Group kugira ngo bisimbuzwe.

Ni ibintu Abanya-Kenya batumva, bakagaragaza ko ikwiriye gusimbuzwa kuko itakijyanye n’ikoranabuhanga rigezweho.

Ikindi bashingiraho ni uko iyi ndege igenda intera nto. Yakabije ikora ibilometero 4000 igatwara abantu 26. Bisobanuye ko ikora ingendo zo mu karere, itabasha kugera nko muri Leta Zunze Ubumwe za Amerika.

Iyo Perezida wa Kenya ashaka gukora ingendo ndende hifashishwa iza Kenya Airways nka Boeing 787 Dreamliners zifite ubwo bushobozi, icyakora bikavugwa ko ari ugusesagura umutungo.

Ikindi Abanya-Kenya bashingiraho bagaragaza ko idakwiriye ni uko umutekano wayo utizewe cyane ko inshuro nyinshi yagiye ikereza ingendo z’abakuru b’ibihugu kubera ibibazo bya tekiniki.