Kigali: Hagiye gufungurwa akabyiniro k’indirimbo z’Imana

Umuhanzi Kavutse Olivier wamenyekanye cyane mu muziki wo kuramya no guhimbaza Imana, agiye gufungura akabyiniro k’umuziki wa ‘Gospel’ i Kigali aba mbere bakazagasohokeramo ku wa Gatanu tariki 3 Mata 2026.

Ubwo yaganiraga n’ikinyamakuru IGIHE yavuze ko ari ahantu hazajya habera ibintu bitandukanye.

Ati “Kimwe mu bintu byambabaje ni uko ino aha usanga Abakristu ari ugusenga gusa kuva ku wa mbere kugeza ku wundi […] naravuze nti kuki mu Rwanda nta kintu cy’imyidagaduro dufite ku buryo wavuga ngo nasohotse ndiye ibiryo, bacuranga umuziki wa ‘Gospel’, hari imikino itandukanye ku buryo wasohoka ukahava wizihiwe.”

Kavutse yafunguye iyo nyubako Kicukiro, aho ku manywa haba hahariwe kwiga no kwihugura cyangwa kuhakorera imirimo ku bantu bashaka ahantu hatuje, hari murandasi ndetse hari n’imashini.

Aha hari igikoni gitunganya ibyo kurya no kunywa ku buryo wakora akazi cyangwa ugasoma ibitabo ariko utishwe n’inzara.

Iyo umugoroba ugeze hagati ya saa kumi n’imwe na saa moya, imirimo ya kumanywa iba irangiye ubundi hakajyamo akabyiniro ariko bacuranga umuziki wa ‘Gospel’.

Ati “Nimugoroba hahita hahinduka ahantu ho kwidagadurira, icyakora ushoboye gukomeza gukorera ibikorwa wakoraga ku manywa mu muziki uba uhari nabyo turabikwemerera.”

Kavutse ahamya ko ari ahantu abantu bajya basohokera bakidagadura cyangwa hakaba ahantu abantu bifuza gutarama bumva umuziki wa ‘Gospel’ bajya bahakodesha mu birori byabo byihariye.

Ati “Ndibuka ko nko mu bukwe bwanjye twagiye kwifotoza dutashye dusanga abantu bizihiwe kubera umuziki […] abakristu bafite ubukwe bashobora kuza bakahafata bakahakorera ibirori byabo bakizihirwa.”

Kavutse Olivier ni umwe mu bahanzi bamaze igihe mu muziki wo kuramya no guhimbaza Imana, icyakora muri iyi minsi we n’umuryango we bimukiye muri Canada aho basigaye batuye.