Komisiyo y’Amatora muri Tanzania mu gitondo cyo kuri uyu wa Gatandatu, yatangaje ko Samia Suluhu Hassan ariwe watsinze amatora y’Umukuru w’Igihugu n’amajwi 97,66%.
Aya majwi yatumye Samia wagiye ku butegetsi mu 2021 nyuma y’urupfu rwa John Pombe Magufuli, akomeza kuyobora Tanzania mu myaka itanu iri imbere. Tanzania ni igihugu gituwe n’abaturage barenga miliyoni 68.
Komisiyo y’Amatora yavuze ko Samia yabonye amajwi arenga miliyoni 31,9 bingana na 97,66% by’abatoye bose. Ubwitabire muri aya matora bwari kuri 87% mu gihe abiyandikishije ku gutora bari miliyoni 37,6.
Ni amatora yakurikiwe n’imvururu mu gihugu aho abiganjemo urubyiruko bavuze ko atabaye mu mucyo kuko ngo hari abatavuga rumwe n’ubutegetsi batemerewe kwiyamamaza.
Abigaragambya bahise batangira kumanura amafoto ya Samia yari hirya no hino ndetse batwika inyubako n’ibindi bikorwaremezo bya leta.
Inzego zishinzwe umutekano zakoze ibishoboka byose kugira ngo zikumire iyi myigaragambyo, zinasaba ko abaturage bakorera mu rugo mu kwirinda ko imvururu zifata indi ntera.
Minisitiri w’Ububanyi n’Amahanga wa Tanzania, Mahmoud Thabit Kombo, ku wa Gatanu yavuze ko imyigaragambyo yakurikiye amatora itari ikanganye nk’uko abantu babivuga.
Yavuze ko ari ahantu hamwe na hamwe habaye ibibazo, bitewe n’abo yise abanyabyaha. Yanamaganye amakuru yavugaga ko inzego z’umutekano zakoresheje ingufu z’umurengera mu gutatanya abigaragambya.
Samia w’imyaka 65 ashimirwa uruhare rwe mu kuyobora Tanzania nyuma y’urupfu rwa Magufuli, igihugu kigakomeza umurongo w’iterambere cyarimo na mbere.
