Rayon Sports yatandukanye na myugariro wayo, Serumogo Ally, nyuma yo gushinjwa imikinire mibi yaganishije iyi kipe ku kunyagirwa na Al Hilal ibitego 4-0.
Kuri uyu wa Gatandatu, tariki ya 17 Mutarama 2026, ni bwo kuri Stade Amahoro habereye umukino w’Umunsi wa 15 wa Shampiyona y’u Rwanda.
Ni umukino Rayon Sports yasabwaga kwitwaramo neza, kugira ngo igarurire icyizere abafana bayo, ariko cyongeye kuyoyoka nyuma y’aho itsindiwe ibitego 4-0.
Umwe mu bakinnyi bashinjwe umusaruro mubi muri uyu mukino ni myugariro, Serumogo Ally, dore ko yahise anasimburwa ku munota wa 64 hajyamo Nshimiyimana Emmanuel ‘Kabange’.
Abafana batangiye kuririmba ‘Kabange’, bashaka kugaragaza ko badashaka kongera kubona Serumogo mu kibuga, dore ko yafashije ikipe guhangana na Girumugisha Jean Claude watsinze ibitego bibiri muri uyu mukino.
Mu itangazo ryashyizwe hanze n’ikipe nyuma y’umukino, yashimiye Serumoga wari na Kapiteni w’iyi kipe ku ruhare rwe mu myaka ibiri n’igice ayimazemo.
Serumogo yageze muri Rayon Sports mu 2023 avuye muri Kiyovu Sports, gusa mu mwaka ushize yari yongereye amasezerano ye.
Ubwo yavaga mu kibuga kuri uyu wa Gatandatu, Serumogo yabanje gupfukama ashinga umutwe hasi ameze nk’ushimira cyangwa usezera.
Hari amakuru avuga ko yaba yaramaze kumvikana n’Ikipe ya El-Merrikh Bentiu yo muri Sudani y’Epfo.
Uyu mukinnyi asize Gikundiro ku mwanya wa cyenda n’amanota 24 ku rutonde rw’agateganyo rwa Shampiyona y’u Rwanda, mu gihe isigaje imikino ibiri ya Mukura VS na Al Merrikh kugira ngo isoze imikino ibanza.
