Perezida wa Leta Zunze Ubumwe z’Amerika, Donald Trump, yavuze ko yahisemo kutagaba ibitero kuri Iran, ndetse ashimangira ko icyemezo yagifashe wenyine, kuko atigeze agirwa inama n’ibindi bihugu mu gufata uwo mwanzuro.
Ibi yabivuze nyuma y’amakuru yatangajwe avuga ko ibihugu bitandukanye birimo Qatar, Arabie Saoudite, Oman, Misiri ndetse na Israel byamusabye kudatera Iran.
Trump yari amaze igihe kinini atangaza ko ashobora kugaba igitero cya gisirikare kuri Iran, mu gihe cyose yaba itangiye guhohotera abaturage bayo bamaze igihe bigaragambya.
Mu kiganiro n’abanyamakuru, Trump yavuze ko icyemezo cyo kudatera Iran yafashe cyaturutse kuri we gusa.
Ati “Nta muntu wabinyumvishije (kudatera Iran) ni njye wafashe umwanzuro.”
Trump yongeyeho ko kuba Iran yarasubitse gahunda yo guhanisha igihano cy’urupfu bamwe mu bakoze iyi myigaragambyo, byagize uruhare runini mu guhindura icyemezo cye.
Ati “Ejo hashize byari biteganyijwe ko hazanyongwa abantu 800. Nta n’umwe bamanitse. Barabihagaritse. Nubaha iki kintu cyo kuba barabihagaritse.”
Ku wa Gatatu tariki 14 Mutarama 2026, Minisitiri w’Ububanyi n’Amahanga wa Iran, Abbas Araghchi yatangarije Fox News ko nta gahunda ihari yo kunyonga abigaragambya.
Araghchi yavuze ko ituze ryatangiye kugaruka muri Iran, gusa ashinja ibihugu birimo Amerika na Israel uruhare mu guhembera iyi myigaragambyo.
Trump kandi yabajijwe niba isezerano rye ryo gufasha abigaragambya muri Iran akirikomeyeho, asubiza agira ati “Tuzareba aho ibintu bigana”.
