Afurika y’Epfo: Umugabo yemerewe kongera izina ry’umugore we kurye

Urukiko rw’Ikirenga rwo muri Afurika y’Epfo rwemeje itegeko ryemerera abagabo kongera izina ry’abagore babo mu mazina yabo, ibyari bisanzwe byemerewe abagore gusa.

Ibi byakozwe nyuma y’uko imiryango ibiri yangiwe gukora icyo gikorwa, maze ikajyana mu nkiko itegeko ribuza abagabo kongera amazina y’abagore babo mu mazina yabo, bavuga ko iryo tegeko ridakurikije amahame y’uburinganire.

Ni urubanza rwahereye mu rukiko rw’ibanze, rujyanwa mu rukiko rukuru, nyuma rwoherezwa mu rukiko rw’ikirenga ngo abe ari rwo rufata umwanzuro.

Ibinyamakuru byo muri iki gihugu byagaragaje ko muri uru rubanza, yaba Minisitiri w’Umuryango, Leon Schreiber, na Minisitiri w’Ubutabera, Mamoloko Kubayi, bari bashyigikiye iyo miryango yashakaga ko itegeko rihinduka.

Uyu mwanzuro ugiye no guhindura itegeko ryari risanzwe ririho rigena kwandikisha uwapfuye.