Isaha y’umugenzi wari mu bwato bwa Titanic yagurishijwe arenga miliyari 3,3 Frw mu cyamunara

Isaha ya zahabu itwarwa mu mufuka yabonetse mu myambaro y’umwe mu bakire bari mu bwato bwa Titanic, yaciye agahigo ko kugurishwa miliyoni 1,78£, asaga miliyari 3,3 Frw.

Isidor Straus n’umugore we Ida bari mu bagenzi 1500 bapfiriye mu bwato bwa Titanic bwaturukaga mu Mujyi wa Southampton bwerekeza i New York ubwo bwagongaga urutari ku wa 14 Mata 1912.

Umubiri we waje kubonwa mu nyanja ya Atlantique nyuma y’aho iyo mpanuka ibaye, ndetse mu bintu bye harimo isaha ifite zahabu ingana na carat 18 [bivuze ko yari zahabu yuzuye ku kigero cya 75% mu gihe irindi janisha risigaye ariryo ryari icyuma] yo mu bwoko bwa Jules Jurgensen. Ni isaha nto itwarwa mu mufuka.

Iyi saha yagumye mu mutungo w’umuryango wa Straus yagurishijwe mu cyamunara kuri uyu wa Gatandatu.

Straus yari umucuruzi w’umunyamerika, akaba n’umunyapolitiki wari umwe mu bashinze iduka rya Macy’s i New York.

Mu ijoro ubwato burohama, bivugwa ko umugore yanze umwanya mu bwato bwato bwari bugiye kubatabara, avuga ko atasiga umugabo we ahubwo byarutwa agapfira iruhande rwe.

Umubiri wa Ida Straus ntabwo wigeze uboneka.

Ibaruwa Ida Straus yanditse ubwo yari mu bwato, yaje kuboneka nayo igurishwa mu cyamunara igurwa ama-pound ibihumbi 100 mu cyamunara.

Ibintu by’abantu bari muri ubu bwato bimaze kugurishwa mu cyamunara ama-pound arenga miliyoni 3.