Musanze: SEDO, DASSO n’abayobozi b’imidugudu 2 batawe muri yombi

Umunyamabanga Nshingwabikorwa n’Ushinzwe imibereho myiza n’iterambere mu Kagari, SEDO, umukozi w’Urwego rushinzwe kunganira akarere mu gucunga umutekano, DASSO n’abayobozi b’imidugudu babiri bo mu Kagari ka Cyabagarura mu Murenge wa Musanze mu Karere ka Musanze batawe muri yombi.

Aba bakurikirannyweho kugira uburangare n’imikorere idahwitse mu bijyanye n’imyubakire.

Umuyobozi w’Akarere ka Musanze, Nsengimana Claudien, yahamije aya makuru, avuga ko aba bakurikiranyweho imikorere idahwitse.

Yabwiye Mama Urwagasabo TV ati “ Ayo makuru niyo, hari abayobozi bakurikiranyweho imikorere idahwitse, aho bagize uburangare,abaturage bakubaka mu buryo bw’akajagari,nta byangombwa.”

Yakomeje agira ati “ Bubakaga ahataragenewe inyubako cyangwa se ahagenewe ubuhinzi. Inzego zikaba ziri gukurikirana kugira ngo harebwe uruhare rwa buri wese. Uyu munsi rero bari mu nzego z’ubugenzacyaha.”

Meya Nsengimana yasabye abafite umushinga wo kubaka ko bajya basaba ibyangombwa mu buryo bukurikije amategeko.

Ati “Iyo uteganyije umushinga wo kubaka,ukwiye kugana inzego zibishinzwe.Ukubaka wubahirije amabwiriza kugirango hato ukaba wagwa mu mutego.”

Ni byiza rero ko abaturage bashishoza, bakirinda ababasezeranya ko babahaye uburenganzira bwo kubaka, nta nkurikizi, nibo babishinzwe nyamara hari uburyo icyangombwa gisabwa binyuze mu Irembo bityo ukanabona ubutumwa ndetse n’ibyo musabwa mukabyuzuza ariko binyuze muri bwa buryo bw’ikoranabuhanga ku irembo, kugira ngo urebe byibuze ko dosiye yuzuye.”

Abatawe muri yombi bafungiye kuri Sirasiyo ya RIB ya Cyuve kugira ngo babazwe ku byo bakurikiranyweho.