Ngoma: Abantu 26 bakubiswe n’inkuba

Abantu 26 bo mu Karere ka Ngoma bakubiswe n’inkuba, umwe ahita yitaba Imana mu gihe abandi bajyanywe kwa muganga.

Iyi nkuba yakubise abaturage ahagana Saa Tanu zo kuri uyu wa Mbere tariki ya 13 Mata 2026, mu Kagari ka Cyarwa mu Murenge wa Gashanda mu Karere ka Ngoma.

Umunyamabanga Nshingwabikorwa w’Umurenge wa Gashanda, Ngenda Mathias, yemeje ko aba baturage bakubiswe n’inkuba ubwo bari bugamye imvura nyuma y’uko ibasanze mu buhinzi bw’umuceri basanzwe bakorera mu gishanga.

Ati “Abantu bose bakubiswe n’inkuba muri rusange ni abantu 26, ariko umwe ni we witabye Imana. Abandi bose twashoboye kubajyana ku bitaro i Kibungo, batatu twabajyanye ku kigo nderabuzima cya Gashanda abandi 22 bose twabajyanye i Kibungo ku bitaro bari kwitabwaho n’abaganga.’’

Gitifu Ngenda yavuze ko aba baturage bakubiswe n’inkuba bari bari mu gishanga gisanzwe gihingwamo umuceri aho bari bari mu mirima.

Yavuze ko ubwo imvura yagwaga bugamye mu nzu ikoreshwa nk’ububiko ari na ho iyo nkuba yabakubitiye avuga ko ubuyobozi buri gukora ibishoboka byose ngo abakiri bazima bitabweho.

Ati “ Turahumuriza imiryango yabo kandi turakomeza kwita ku buzima bwabo, turasaba kandi abaturage kujya bakurikiza amabwiriza bahabwa n’inzego zitandukanye ajyanye no kwirinda ibikorwa byatuma imvura ibasanga ahantu habi.’’

Uretse mu Murenge wa Gashanda no mu wa Rukumberi inkuba yakubise umuturage umwe arahungabana kuri ubu akaba yajyanywe kuvurirwa ku kigo nderabuzima cya Gituza.

Tariki ya 4 Mutarama 2026 mu Karere ka Ngoma mu Murenge wa Jarama na bwo inkuba yakubise abantu 15 icyenda bahita bitaba Imana.