Nyamasheke: Abantu 3 bafunzwe bakekwaho kwica umugore babanje kumukata ibere, kumukuramo amaso no kumujomba igiti mu myanya y’ibanga

Umugore wo mu Karere ka Nyamasheke w’imyaka 59 yasanzwe mu muferege w’umuhanda yishwe atewe ibyuma, akurwamo amaso, akatwa ibere ndetse anajombwa igiti mu gitsina hakekwa abantu batatu barimo n’umugabo we n’umukobwa wa mukuru we.

Byabereye mu Mudugudu wa Gahondo, Akagari Mpumbu, Umurenge wa Bushekeli ku wa 1 Gashyantare 2026.

Saa Tanu z’ijoro ni bwo abaturage babonye uyu mubyeyi witwa Nyiranzabamwita Phelomène mu isantere y’ahitwa i Kigali ahazwi nko kwa Sebujangwe yapfuye bahita babimenyesha ubuyobozi.

Umwe mu bana batanu ba Nyiranzabamwita yavuze ko uwa mbere bakeka ari umukobwa wa mukuru wa nyina kuko ngo yari amaze iminsi yigamba ko atazageza tariki 15 Gashyantare atamwishe.

Uwo mwana avuga ko icyo bapfuye ari icupa ry’inzoga nyakwigendera yaguriwe n’umukwe we, uwo mukobwa akarimushikuza akariha abagabo bari kumwe mu kabari, hanyuma Nyiranzabamwita akabwira nyir’akabari ko iryo cupa aryishyuza n’uwo mukobwa.

Ababonye umurambo w’uyu mugore wari wavuye mu rugo agiye ku isantere bavuga ko abamwishe bamukase ibere, bamukuramo amaso, banamujomba igiti mu gitsina.

Umunyamabanga Nshingwabikorwa w’Umurenge wa Bushekeli, Jean Paul Harindintwari yatangaje ko bakimenya aya makuru bajyanyeho n’inzego z’umutekano.

Ati “Hari abantu batatu bafashwe. Ubutumwa twahaye abaturage ni ukubasaba kujya batangira amakuru ku gihe, igihe babonye ikintu gishobora guhungabanya umutekano, no kujya begera ubuyobozi bukabafasha gukemura amakimbirane bagiranye”.

Umurambo wa Nyiranzabamwita wajyanywe ku Bitaro bya Kibogora gukorerwa isuzuma mbere y’uko ushyingurwa.

Src: IGIHE