Perezida wa Benin yatangaje ko Guverinoma n’Ingabo z’i gihugu byaburijemo coup d’État yari yateguwe n’itsinda ry’abasirikare

Perezida wa Benin, Patrice Talon, yatangaje ko Guverinoma n’Ingabo z’iki gihugu byaburijemo coup d’État yari yateguwe n’itsinda ry’abasirikare, anizeza ko ababyigambye bagiye guhanwa bikomeye.

Ibi Talon yabitangaje ku mugoroba wo ku Cyumweru, amasaha agera kuri 12 nyuma y’uko imirwano n’amasasu byumvikanye mu bice bitandukanye by’Umurwa Mukuru, Cotonou, ndetse abasirikare bakajya kuri televiziyo ya Leta bavuga ko bamukuyemo ku butegetsi.

Talon yavuze ko kwihutira gukorana n’ingabo z’abizerwa z’iki gihugu ari byo byatumye bahangana n’abo yise “abashukanyi”.

Yagize ati “Ubu bugambanyi ku gihugu nta bwo buzihanganirwa na gato.”

Mu gitondo cyo kuri iki Cyumweru tariki 7 Ukuboza 2025, ni bwo itsinda ry’abasirikare ba Bénin ryateye urugo rwa Perezida Patrice Talon, rishaka kumuhirika ku butegetsi.

Amakuru dukesha Jeune Afrique, avuga ko aba basirikare basubijwe inyuma n’abandi badashyigikiye uyu mugambi.

Aba basirikare bayobowe na Lieutenant-Colonel Pascal Tigri, bari babashije gufata televiziyo y’igihugu, ari na ho batambukije ubutumwa buvuga ko bakoze ‘coup d’état’.

Mbere y’uko televiziyo iva ku murongo, aba basirikare bavuze ko bashyizeho Komisiyo ya gisirikare igamije impinduka, basesa Itegeko Nshinga, inzego za leta n’amashyaka yose ya politike.

Bavuze kandi ko bafunze imipaka yose ihuza Bénin n’ibindi bihugu. Bashimangira ko bahiritse ubutegetsi kubera ko hari abo ubuyobozi bwa Perezida Talon bwaheje, bamwe barafungwa abandi barahunga.

Umuvugizi wa Guverinoma, Wilfried Léandre Houngbédji, yavuze ko abantu 14 bamaze gutabwa muri yombi ku Cyumweru ku manywa, nubwo atigeze atanga ibindi bisobanuro.

Iyi coup yageragejwe mu gihe Benin iri mu myiteguro y’amatora ya Perezida ateganyijwe mu Mata, azasoza manda ya Talon watangiye kuyobora mu 2016, kuko yatangaje ko atazongera kwiyamamaza.

Mu itangazo ryabo kuri televiziyo, abasirikare bakuze coup bavuze ko bashingiye ku mutekano muke uri mu Majyaruguru ya Benin, bongera ko hari “kwirengagiza no kutita ku ngabo zacu zaguye ku rugamba.”