Rusizi: Inzu y’umuturage yafashwe n’inkongi y’umuriro ihiramo abifite agaciro ka miliyini 15 Frw

Inzu y’umuturage wo mu Karere ka Rusizi yafashwe n’inkongi y’umuriro irashya irakongoka n’ibyarimo byose bivugwa ko byari bifite agaciro k’arenga miliyoni 15 Frw.

Iyi mpanuka yabereye mu Mudugudu wa Murangi, Akagari ka Kamurera, Umurenge wa Kamembe mu Karere ka Rusizi ku wa 13 Kanama 2025.

Saa 11:40 ni bwo umwana wo muri urwo rugo yarashe ikibiriti gikongeza matela itwika inzu n’ibikoresho byose byo mu nzu.

Nyir’inzu Rusizana Maurice w’imyaka 39 yavuze ko mu byangirikiye mu nzu ye harimo firigo, amateleviziyo, amatara agezweho, intebe, imyenda y’abana n’iy’umugore n’ibikoresho byo mu nzu.

Ati “Byahiye byose kugera kuri kambabiri. Nsigaye gutya. Ndi mu gahinda gakomeye uwagira icyo amfasha nk’umuntu wahuye n’ibyago yamfasha”.

Inzu yahiye yari ifite agaciro ka miliyoni zirenga 40 Frw, ibyangirikiyemo bifite agaciro k’arenga miliyoni 15Frw.

Umuvugizi wa Polisi y’u Rwanda mu Ntara y’Iburengerazuba, SP Twajamahoro Syvestre, yemeje ko iyi nzu itari mu bwishingizi, asaba abaturage kwirinda inkongi z’umuriro ariko bakanibuka gufasha ubwishingizi.

Ati “Tuributsa abantu ko bakwiye kwirinda inkongi z’umuriro, bakanibuka gufata ubwishingizi bw’ibikorwa byabo birimo n’amazu. Turabasaba kujya birinda gusiga bacanye za buji, tunabibutsa ko igihe habaye inkongi bagomba guhita bahamagara ishami rya polisi ntibabyihererane, ikindi ni ukugira ibikoresho by’ibanze mu kuzimya umuriro birimo umucanga na zakizimya mwoto aho bishoboka cyane cyane abafite amazu y’ubucuruzi”.