Rusizi: Umusaza warumaze igihe abwira abana be ko aziyahura yasanzwe mu mugozi yapfuye

Umusaza w’imyaka 70 yasanzwe mu mugozi yapfuye bikekwa ko yiyahuye, abaturanyi be bavuga ko abana be banze ko ashaka umugore.

Inkuru y’umusaza witwa Nteziryimana Afred yiyahuye yamenyekanye mu gitondo cyo kuri uyu wa Gatanu tariki ya 7 Ugushyingo 2025,

Amakuru avuga ko yari amaze imyaka igera kuri itandatu abuze umugore we babanaga wapfuye, andi akavuga ko yiyahuye bitewe n’uko yabuzwaga n’abana gushaka undi mugore.

Iyakaremye Jean Pierre ni umunyamabanga nshingwabikorwa w’umurenge wa Gihundwe, yahamije ko uyu musaza yiyahuye akoresheje ikiziriko.

Ati “Nibyo yitwa Nteziryimana Alfred, yiyahuye akoresheje ikiziriko, twabimenye mu gitondo (ku wa Gatanu). Nta mugore yari afite yabanaga na murumuna we.”

Uyu murumuna we babanaga ufite ubumuga, ni we wabimenye agiye kumubyutsa arunguruka mu rugi amubona ahagaze abona umugozi, aratabaza.

Inzego z’ubuyobozi zishe urugi, binjiyemo basanga yapfuye.

Umunyamabanga nshingwabikorwa w’umurenge wa Gihundwe yakomeje avuga ko, uriya musaza yari abanye neza n’abaturanyi be, ko yahoraga abwira abana be ko aziyahura.

Yavuze ko amakuru ava mu baturage ari uko nyakwigendera yabuzwaga gushaka undi mugore ko atari yo, ahubwo ngo icyo yasabwaga n’abana be ni ukumushaka baciye mu nzira zemewe, we akababwira ko aziyahura.

Ati “Amakuru dufite twahawe n’abaturanyi, n’abana be avuga ko bari babanye neza, yahoraga abwira abana be ko aziyahiura. Abana batubwiye ko ntawigeze amubuza kuzana umugore, bamusabaga kumushaka byemewe n’amategeko.”

Ubuyobozi busaba abaturage ko nta we ukwiye kwiyambura ubuzima, ko ibibazo byose wahura na byo wabibwira abaturanyi n’ubuyobozi.

Umuyobozi kandi yasabye abaturage kureka kwirengagiza ibimenyetso byo kwiyahura byagaragajwe n’umuturage.

Urwego rw’igihugu rw’ubugenzayaha (RIB) rwahageze n’izindi nzego zirimo Polisi hakorwa iperereza, umurambo wa Nyakwigendera wajyanywe mu bitaro bya Gihundwe gukorerwa isuzuma.