U Bufaransa: Umunyarwanda arakekwaho kwica umugore we

Umugabo ukomoka mu Rwanda, arakekwaho kwica umugore we mu gace ko mu Bufaransa kitwa Rhône, ikinyamakuru Le Parisien kivuga ko uwo mugore yicishijwe ibyuma.

Uwo mugabo yatawe muri yombi akaba afungishijwe ijisho.

Nyakwigendera ni umugore w’imyaka 35 y’amavuko, yishwe n’umugabo we ku Cyumweru tariki 26 Ukwakira, 2025 ahitwa Saint-Priest.

Amakuru avuga ko uriya mugore yari yatanze ikirego mu mwaka wa 2014 na 2019 agaragaza ko ahohoterwa.

Biriya byabaye ubwo abana batatu bafitanye bari basinziriye, umwana umwe afite imyaka 6 mukuru we afite 9 umukuru muri bo afite imyaka 12.

Bariya bana ngo batwawe n’umwe mu miryango yabo wiyemeje kuba ubafite.

Uriya mugore na we w’Umunyarwandakazi, mu mwakwa wa 2014 na 2019 yari yareze umugabo w’imyaka 39 agaragaza ko amuhohotera.

Nyuma y’uko uyu mugabo yishe umugore we ngo yagiye kuri mubyara we utuye ahitwa Meyzieu, amubwira ko amaze kwica umugore we.

Mu Bufaransa ubwicanyi bwo mu muryango bwibasiye abagera ku 131 kuva uyu mwaka utangiye. Umuryango witwa “Nous Toutes”, ukaba wamagana ubwo bwicanyi.

Le Parisien kivuga ko imibare yatangajwe mu mpera z’Ugushyingo 2024 igaragaza ko abagore 96 bishwe n’abo bashakanye mu mwakwa wa 2023, mu makimbirane y’abakundana 119.

Muri aya makimbirane 82% abagabo ni bo bishe abagore.

Nta gihe gishize mu Bubiligi naho humvikanye umugabo ukomoka mu Rwanda wishe umugore we bari bafitanye abana babiri.