Nyuma y’imyaka 22 Arsenal yongeye kwegukana Premier League

Ikipe ya Arsenal yegukanye Igikombe cya Shampiyona y’u Bwongereza, Premier League, nyuma y’imyaka 22. Ni nyuma y’umukino Manchester City yanganyije na AFC Bournemouth igitego 1-1.

Kuri uyu wa Kabiri, tariki ya 19 Gicurasi 2026, ni bwo Man City yakinnye umukino wayo w’Umunsi wa 37 wa Shampiyona y’u Bwongereza, wakiniwe kuri Vitality Stadium yarimo abafana barenga ibihumbi 11.

Iyi kipe yari iwayo yatsinze igitego ku munota wa 39 cyinjijwe na Eli Junior Kroupi, Manchester City ishaka kwishyura hasi hejuru, ibona igitego ku munota gatanu w’inyongera kuri 90 y’umukino, cyinjijwe na Erling Haaland.

AFC Bournemouth yanganyije uyu mukino ihita ishimangira ko ari imwe mu makipe azahagararira u Bwongereza mu marushanwa y’i Burayi, urugendo yaherukagamo mu myaka 127.

Kunganya kwa Man City itozwa na Pep Guardiola uzatandukana na yo ku mpera z’uyu mwaka w’imikino, byatumye igira amanota 78, irushwa ane na Arsenal mu gihe hasigaye umukino umwe.

Arsenal yaherukaga iki gikombe mu mwaka w’imikino wa 2003/04, icyo gihe ikaba yaragitwaye idatsinzwe umukino n’umwe. Ni icya kane kandi itwaye mu mateka yayo, dore ko yatwaye n’icyo mu 1997/98 no mu 2001/02.

Arsenal ifitanye ubufatanye n’u Rwanda kuva mu 2018, ariko buzarangirana n’uyu mwaka w’imikino wa 2025/26, izasoza Premier League yakirwa na Crystal Palace ku Cyumweru guhera Saa 17:00.

Urugendo rwo kurushaho kwandika amateka, ruzakomereza ku mukino Arsenal ifitanye na Paris Saint-Germain muri UEFA Champions League, mu gihe yawutsinda ikaba ari ubwa mbere yaba yegukanye iki gikombe.